මුවාගේ Love එක - 1 කොටස

 

  ඔන්න ඉතින් කොටස් වශයෙන් මුවාගේ ලව් පුවත ගැන කියන්න කලින් අපේ මුවා ගැන කියන්න ඕනනේ. මුවා කියන්නේ දකුණු පළාතේ මැද්දට වෙන්න පිහිටලා තියෙන ප්‍රධාන නගරෙක ඉදන් හූ තුනක විතර දුරින් ජීවත් වෙන කොල්ලේක්. කොල්ලෙක් කිව්වට ආධුනික කොල්ලෙක්. මුවා ගියේ මං ගියපු විද්‍යාලෙටම නිසා අහිංසක අපේ විද්‍යාලේ බාල්දු කරන්න මට බෑ. ඒත් මං අදටත් විස්වාස කරන්නේ මුවා අපේ විද්‍යාලෙට ගියේ විද්‍යාලයේ සහ අපේ තිබුණ අවාසනාවට කියලා. මුවා ගැන කියද්දි මුගේ බෝක්කු කට ගැනනම් අනිවාර්යයෙන් වෙනම කතාවක් කියන්න ඕන.ඒක පස්සට තියලා කියන්නම්කෝ මුවාගේ පෙම් පුවත ගැන.

    මුවා කියන්නේ ජීවිතයේ ප්‍රයිමරි අවධියේ අම්මාගේත්.සෙකන්ඩ්‍රි අවධියේ අක්කාගේත් ඉන්පසු අවධිවල මිත්තරයන්ගේත පාලනයන්ට යටත් වෙච්ච අහිංසක පොරක්. හැබැයි මුවාගේ නසරානි වැඩ නිසා සහ ගොබ්බ අදහස් නිසයි මු පලාතටම ජූත වෙලා තියෙන්නේ. මේ පලාතේ මිනිස්සුනම් මුවා කියන්නේ කව්ද කියලා කිව්වම හොදට දන්නවා. ඒත් අද වෙනකොට මුවා ලංකාවේ වැදගත් ආයතනයක වැඩ කරන නිසාත් අපි සේරටම කලින් කසාදෙකුත් කරගත්තු නිසා අනන්‍යතාවය වැඩිය එළිකරන්න බෑ. එහෙන් මෙහෙන් එලිවුණාට ඒක නිකං අමතක කරලා දාන්න ‍හොදේ.

   ඉතින් ඔන්න මුවාට කෙල්ලෙක් හිටියේ නෑ. මොකද ඒකාලේ වෙනකොටත් ලංකාවේ කාන්තා පරපුර කරපු පුණ්‍යකර්ම පොඩ්ඩක් හරි ඉතුරු වෙලා තිබුණ නිසා. ඔන්න සාමාන්‍ය පෙල ඉවරවෙලා ඊට එහා පෙල පන්ති පටන් ගන්න දවස්වල අනිත් එවුන්ට අපේ සෙට් එකේ කෙල්ලෝ එකා දෙන්නා හිටියා. විශේෂයේන් ටුබේ.බූලා.ජිම්.තව තව අපේ සෙට් එකේ බහුතරේකට කෙල්ලෝ හිටියා. ඒක නිසා ඔය දවස්වල මුවා හිටියේ පශ්චත්තාපෙන් පස්ස බිම ඇණගෙන. ඒ දවස් වල මූ මට කියන්නේ.. මචං එළා...මෙහෙම ඉදලා හරියන්නෑ...මමත් හොයාගන්න ඕන කෙලිපැටික්කියක්. ඉතින් අහිංසක කෙලිපොඩිත්තෝ ගැන හිතලා අපි කව්රුත් ඕකට රුකුල් දුන්නේ නෑ. 

    ඔන්න ඒ ලෙවල් ක්ලාස්  කියන්නේ ප්‍රේම පාරාදීසනේ.අපි ඒ ලෙවල් කරන්න තෝරගත්තේ කොමර්ස්. එදා ඉදන් අපේ එවුන් සේරම හැසිරෙන්නේ මැනේජර්ස් ලා.එකවුන්ටන්ස් ලා. බෑන්කර්ස් ලා වගේ. පාරෙ යන්නෙත් ගිණුම් ගහ ගහ. ඉතින් සේරම සෙට් එකම මුලින්ම ගියේ අපේ නගරේ තිබුණ සුපිරි එකවුන්ට් ක්ලාස් එකකට..අපේ සර් ටිකක් කොට මොඩල් පොරක්. ඉතින් ඔන්න පලවෙනි දවසේ ඉන්න කෙල්ලෝ දාහක විතර කන්දරාව දැක්ක විතරයි මුවා පොළවේ පස්කන්න හදනවා.ජිම් කාරයා පොලවේ ලිං හාරනවා මාපටගිල්ලෙන්. බූලා ඩෙස් හූරනවා හරියට වැලිකඩදාසියක් වගේ. ලකියා ඇටිකෙහෙල් කාපු රිලවා වගේ හතර වටේටම විරිත්තනවා කොල්ලන්ටත් විරිත්තනවා. භූතයා තුෂ්නිම්භූතවෙලා වගේ බලං ඉන්නවා.බලනකොට ඌට මීමැස්මොරෙත් හැදිලා(එදා ගෙදර යනකොටයි ඒක දන්නෙත්). ඉතින් එක එක ලෙඩ හැදිච්ච අපේ සෙට් එකයි බෝල බෝල බැලුම් බෝල වගේ කෙල්ලෝ දිහා බලං ඉන්න මාවයි දැකපු අපේ ක්ලාස් එසේ කෙල්ලොත් නිකං කරකවලා අතෑරියා වගේ බලං  ඉන්නවා. නිකං වෙන ග්‍රහලෝකෙකින් ආපු ස්ටුඩන්ස්ලා ටිකක් දිහා බලනවා වගේ තමයි උන් බැලුවේ.

   අපිට මොකද ඕවා කියලා අපි ගිහිල්ලා එක එක තැන් වල වාඩි වුණා. මං ගිහිල්ලා වාඩි වුණේ දාර පොරක් ගාව. ඌ අහිංසක හිනාවක් දාලා ගුඩ් මොර්නින් කිව්වා..කෙලිපොඩිත්තෝ දැකලා විකාර වෙලා හිටපු මං ඉබේම වගේ සේම් ටු යූ කියලා කිව්වා. ඒක නොතේරුණු නිසාද කොහේද අර තඩි නරියා ආයෙමත් අහිංසක තාලෙට හිනාවුණා.

   ඔන්න ඉතින් පැය දෙකක් විතර විකාරෙන් වගේ එකවුන්ට් ක්ලාස් එකේ මුල්ම දවසේ හිටපු අපි සෙට් එක හරක් ගාලකින් එලියට එනවා වගේ එලියට එන්න පඩිපෙල බහිනවා. ඊලගට කස්ටිය සෙට්වෙලා පඩිපෙල බහින ගමන්ම කථාකලේ ඉකෝන්වලට කාගෙද ක්ලාස් යන්නේ කියල. මේ ක්ලාස් එකේම පහල තට්ටුවේ ඉකෝන් ක්ලාස් එකක් තව ටිකකින් පටන් ගන්නවා කියලා එකෙක් කිව්වා. කන්දඋඩ සර්ගේ ක්ලාස් එකට යමු කියලා අපි ඒක මතික තීරණේකට ආවා. ඔන්න ඉතින් කස්ටිය ඒ ක්ලාස් එකට රිංගුවා. කට කපලා සෙනග. හරියට සැමන් ටින් එකක මාලුවා ඉන්නවා වගේ. කෙල්ලෝ වැහි වැහැලා. 

   ඉතින් අපේ එවුන්ටික ආයෙත් පුරුදු ලක්ෂණ පෙන්නන්න පටන් ගත්තා. උදේ ක්ලාස් එකේ වගේම මේකේ කෙල්ලොත් අපි දිහා බැලුවේ නිකං විකාරෙන් වගේ. ඉකෝන් ක්ලාස් එකේ විශේෂත්වේ තමයි ආට් කරන එවුනුත් එන එක. ඉතින් අපේ පොදු පිළිගැනීමේ හැටියට ලස්සනම කෙල්ලෝ ගොඩක් කලාබරයි. ඉතින් මේ කලාබර ලස්සන කෙල්ලො ටිකක් හරි ඉකෝන් කරන්නත් එනවා. ඒක හරියටම හරි කියලා පෙන්නන්න වගේ ඉකෝන් ක්ලාස් එකේ ඉන්නවා නිකං ඉටි රූප වගේ නංගිලා දුසිම් ගණන්. හරියට සුපර් මාර්කට් එකේ රාක්කවල ඉන්නවා වගේ. 

   ඉතින් කෙල්ලෙක් නැතිව සුසුම් හෙල හෙල හිටපු මුවා මේ වා දැකලා පස්වනක් ප්‍රීතියෙන් ගිගුම් දෙමින් බෙ‍රිහන් දිදි බල්ලෙක් වගේ උඩු බුර බුර තමයි ක්ලාස් එකට රිංගුවේ. ඉතින් වාඩිවෙන් පස්සේ පේලිවලනම් අගලක් වත් ති‍බ්බේ නෑ. ඉඩ තිබුණේ ඉස්සරහා පේලි දෙකේ තමයි. මුල් පේලිය සාංඝික කරලා තිබුණ නිසා තැඹිලි පාටින් දිලිසි දිලිසි තිබුණා. දෙවනි පේලිය හා තුන්වෙනි පේලිය අධ්‍යාපනයටම කැපවුණු උප්පැන්න සහතිකයට පමණක් පුරුෂ ලෙස හැදින්වෙන කොල්ලෝ සදහා වෙන්කරලා තිබුණා. දෙයියනේ මුං එක්ක නේද අපිටත් වාඩිවෙන්න වෙන්නේ කියලා අපේ සෙට් එකම ‍පුල් මූඩ් ගහලයි හිටියේ. කරන්න දෙයක් නෑ ඉතින් ඊළග සතියෙවත් තැනක් අල්ලගමු කියලා කස්ටිය වාඩිවුණා.

    - පෙම් අත්පොත් තබන මුවා ඊලග කොටසින් -